Í dag og á morgun er spáð miklu frosti á öllu landinu. Elín Björk Jónasdóttir, veðurfræðingur á Veðurstofu Íslands segir veðrið ekkert óvenjulegt miðað við árstíma: „Þetta er bara norðanátt og kalt loft sem berst langt úr norðri og yfir landið. Ég er að spá svona sjö til fimmtán stiga frosti á öllu landinu. Það er síðan spurning hvað gerist í kvöld þegar vindurinn dettur niður, þá gæti orðið meira frost yfir nóttina,“ segir Elín Björk.

Hún segir að fólk eigi að nota skynsemina í veðri sem þessu og fara ekki út húfulaus svo dæmi séu tekin: „Það er vindur með þessu frosti svo við búumst ekki við miklu svifryki sem er oft algengt í miklu frosti og logni en svifrykið er verst fyrir fólk með öndunarfærasjúkdóma. Það má því segja að rok með frostinu sé betra fyrir þennan hóp,“ segir Elín Björk.