Karen Kjartansdóttir, upplýsingafulltrúi Samtaka fyrirtækja í sjávarútvegi, hefur sagt starfi sínu lausu hjá samtökunum.

Frá þessu greindi Karen á Facebook síðu sinni þar sem að hún þakkar samstarfsfólki sínu fyrir ánægjuleg samskipti og óskar þeim góðs gengis í þeim verkefnum sem framundan eru.

Karen var ráðin til LÍU árið 2013 og tók þátt í sameiningu LÍU og SF í SFS. Karen er bókmenntafræðingur og hafði starfað í fjölmiðlum frá byrjun árs 2005. Hún hóf störf á DV og vann þar til ársins 2006 en flutti sig þá yfir á NFS, því næst fór hún á Fréttablaðið og starfaði þar til ársins 2010 en þá hóf hún störf á fréttastofu Stöðvar 2.