*

miðvikudagur, 19. september 2018
Fólk 7. október 2013 14:34

Karen Kjartansdóttir ráðin til LÍÚ

Karen Kjartansdóttir, varafréttastjóri Stöðvar 2, hefur verið ráðinn upplýsingafulltrúi Landssambands íslenskra útvegsmanna.

Ritstjórn

Karen Kjartansdóttir, varafréttastjóri Stöðvar 2, hefur látið af störfum hjá 365. Hún mun hefja störf sem upplýsingafulltrúi Landsambands íslenskra útvegsmanna (LÍÚ) á morgun.

„Ég hef unnið í góðu yfirlæti hjá 365 í um árabil og óska samstarfsmönnum mínum þar alls hins besta,“ segir Karen Kjartansdóttir, í samtali við VB.is „Eftir að hafa unnið sem blaðamaður í þennan tíma tel ég tímabært að hefja störf á nýjum vettvangi. Ég hef alltaf haft áhuga á grundvallaratvinnuvegunum og sjávarútvegnum þar á meðal,“ segir hún enn fremur. 

Karen er bókmenntafræðingur og hefur starfað í fjölmiðlum frá byrjun árs 2005. Hún hóf störf á DV og vann þar til ársins 2006 en flutti sig þá yfir á NFS, því næst fór hún á Fréttablaðið og starfaði þar til ársins 2010 en þá hóf hún störf á fréttastofu Stöðvar 2. Frá því í sumar hefur hún gegnt stöðu varafréttastjóra á Stöð 2. 

Hlynur Sigurðsson var áður upplýsingafulltrúi LÍÚ en hann er núna kominn til starfa hjá kvikmyndaframleiðslufyrirtækinu Stórveldinu. 

------------
Uppfært klukkan 15:27
Í tilkynningu frá Karen þakkar hún samstarfsfólki sínu hjá 365 innilega fyrir samstarfið síðast liðinn áratug og segist hlakka til að takast á við ný verkefni hjá LÍÚ.

Stikkorð: LÍÚ LÍÚ