*

fimmtudagur, 20. september 2018
Innlent 2. febrúar 2018 13:07

Katrín lætur skoða tjáningarfrelsið

Forsætisráðherra vill endurskoða lög um hatursáróður, ærumeiðingar og gagnageymd fjölmiðla ásamt fleiru.

Ritstjórn
Haraldur Guðjónsson

Katrín Jakobsdóttir forsætisráðherra hyggst skipa sjö manna nefnd til að vinna að endurbótum á löggjöf um tjáningar-, fjölmiðla- og upplýsingafrelsi á grundvelli hugmynda um að Ísland skapi sér lagalega sérstöðu varðandi vernd þessa frelsis.

Meðal þeirra laga sem nefndin á að fara yfir eru lög um ærumeiðingar og hatursáróður, ábyrgð hýsingaraðila, rafræn viðskipti og afnám gagnageymdar. Verður nefndin skipuð fulltrúum ráðuneyta sem fara með framkvæmd viðkomandi löggjafar auk annars kunnáttufólks segir í fréttatilkynningu frá ráðuneytinu, en málið var kynnt á fundi ríkisstjórnarinnar í dag.

Verkefni nefndarinnar verður fjórþætt segir í tilkynningunni: 

  • Í fyrsta lagi að fara yfir þau frumvörp sem urðu til á vettvangi stýrihóps mennta- og menningarmálaráðherra sem skipaður var í kjölfar þingsályktunar nr. 23/138 um að Ísland skapi sér afgerandi lagalega sérstöðu varðandi vernd tjáningar- og upplýsingafrelsis. Þau frumvörp lutu að ærumeiðingum, afnámi svokallaðrar gagnageymdar á grundvelli fjarskiptalaga, ábyrgð hýsingaraðila, sbr. lög um rafræn viðskipti, og hatursáróðri. 
  • Í öðru lagi að taka til skoðunar fyrirliggjandi tillögur er lúta að tjáningarfrelsi opinberra starfsmanna og eftir atvikum skyldu þeirra til að greina frá lögbrotum eða brotum á siðareglum sem þeir verða áskynja um í starfi. 
  • Í þriðja lagi að fara yfir gildandi upplýsingalög í ljósi þróunar á alþjóðavettvangi og framkvæmdar laganna og meta hvort þörf sé á lagabreytingum. Í því sambandi verði kannað hvort fullgilding samnings Evrópuráðsins um aðgang að opinberum gögnum kalli á lagabreytingar hér á landi. Þá verði lagt mat á erindi sem forsætisráðuneytinu hafa borist á undanförnum árum varðandi endurskoðun laganna og önnur atriði sem sérstaklega hefur reynt á í framkvæmd. Má nefna undanþágur vegna gagna er lúta að lögfræðiráðgjöf varðandi málshöfðun gegn opinberum aðilum, gögn er varða útboð eða val á viðsemjendum í ljósi samkeppnisréttar og fyrirkomulag varðandi undanþágur frá gildissviði laganna. 
  • Í fjórða lagi að meta hverjar aðrar lagabreytingar kunni að vera æskilegar á sviði tjáningar-, fjölmiðla- og upplýsingafrelsis. 

Nefndinni er ætlað að skila tillögum um fyrri tvö atriðin 1. október næstkomandi og síðari tvö 1. mars 2019.