*

sunnudagur, 23. september 2018
Innlent 11. september 2018 20:06

Kaup Haga á Olís samþykkt

Hagar og Olís skuldbinda sig til að selja verslanir. Þá á FISK Seafood að selja hlut sinn í Högum.

Ritstjórn
Finnur Árnason, forstjóri Haga.
Haraldur Guðjónsson

Samkeppniseftirlitið hefur samþykkt kaup Haga á Olís með skilyrðum um sölu verslana og bensínstöðva auk þess að FISK Seafood er gert skylt að selja hlut í Högum sem það eignast í viðskiptunum. Upphaflega var skrifað undir kaupsamning 26. apríl 2017 en nú liggur samþykkti Samkeppniseftirlitsins fyrir, rúmu ári síðar.

Samkvæmt tilkynningu frá Högum eru helstu skilyrði samrunans eftirfarandi.

1. Samrunaaðilar skuldbinda sig til að bjóða sama verð á dagvöru á Olís stöðvum um land allt.

2. Samrunaaðilar skuldbinda sig til að selja nýjum endurseljendum eldsneytis, sem eftir því leita, eldsneyti í heildsölu á viðskiptalegum grunni.

3. Aðgengi endurseljenda eldsneytis að birgðarými hjá Olíudreifingu verður tryggt að því marki sem Olís er unnt sem annar eigandi félagsins.

4. Samrunaaðilar skuldbinda sig til að selja rekstur og fasteign félagsins að Faxafeni 14, þar sem verslun Bónus er starfrækt.

5. Samrunaaðilar skuldbinda sig til að selja rekstur og fasteignir Olís þjónustustöðvanna við Háaleitisbraut 12 og Vallargrund 3.

6. Samrunaaðilar skuldbinda sig til að selja rekstur verslana Bónus að Hallveigarstíg 1 og Smiðjuvegi 2.

7. Samrunaaðilar skuldbinda sig til að selja rekstur Olís verslunarinnar í Stykkishólmi. Samrunaaðilar skuldbinda sig til að selja rekstur og aðstöðu ÓB stöðvar við Starengi 2, Kirkjustétt 2-5 og Knarrarvog 2 í Reykjavík.

8. Annar seljenda Olís, FISK-Seafood ehf., skuldbindur sig gagnvart Samkeppniseftirlitinu til að selja að hluta þann eignarhlut í Högum sem hann fær afhentan skv. kaupsamningi. Hagar hafa samhliða samþykkt að falla frá sölu- og framsalsbanni sem fram kom í kaupsamningi milli aðila frá 26. apríl 2017.

Samkvæmt sátt Samkeppniseftirlitsins við Haga má smásölurisinn ekki framkvæma samrunann fyrr en sölu fyrrgreindra eigna er lokið. Hagar segjast þegar hafa undirritað kaupsamninga um eignirnar. Samruninn komi ekki til framkvæmda fyrr en Samkeppniseftirlitið hafi metið hæfi kaupenda eignanna, sem Hagar vonast til að verði lokið í síðasta lagi um miðjan nóvember.

Þá segir jafnframt að hugað verði að réttindum starfsfólks og að atvinna starfsfólks sé tryggð. Heildarvirði Olís og fasteignafélagsins DGV sem fylgir með í kaupunum eru 17,1 milljarður króna. Í framhaldi af samrunanum verður unnið að því að endurskipuleggja fjármagnsskipan Haga með það að markmiði að hámarka nýtingu eigna og straumlínulaga rekstur.

Ráðgjafar Haga gera ráð fyrir að samlegðaráhrifin af kaupunum nemi um 600 milljónum króna á ársgrundvelli, sem nemur um 3% af samanlögðum rekstrarkostnaði hinna sameinuðu félaga. Hlutfall nettó vaxtaberandi skulda félaganna á móti EBITDA verður um 2,0. Ráðgjafar Haga í viðskiptunum voru Arctica Finance og Landslög.

Stikkorð: Hagar Olís Samkeppniseftirlitið