*

fimmtudagur, 15. nóvember 2018
Erlent 2. maí 2018 10:21

Kaupa eigin bréf fyrir 10.000 milljarða

Apple jók við hagnað sinn á fyrsta ársfjórðungi ársins og kynnti veglega endurkaupaáætlun samhliða uppgjörinu.

Ritstjórn
Tim Cook, forstjóri Apple.
epa

Apple tilkynnti um nýja endurkaupaáætlun á eigin bréfum en sú áætlun er af dýrari gerðinni. Félagið hyggst kaupa eigin bréf fyrir 100 milljarða dala eða sem nemur 10.000 milljörðum króna. Það er næstum því á við fjórfalda landsframleiðslu Íslands í fyrra. Félagið er afar burðugt fjárhagslega og situr á 145 milljörðum dala í bankanum að því er BBC greinir frá

Um langa hríð greiddi félagið engan arð né endurkeypti eigin bréf en þeirri stefnu var breytt árið 2012. Síðan þá hefur félagið greitt hluthöfum sínum út 275 milljarða dala í arði og með endurkaupum á eigin bréfum að því er segir í The Wall Street Journal

Samhliða þessu greindi Apple frá uppgjöri á fyrsta ársfjórðungi ársins. Hagnaður félagsins á ársfjórðungnum hækkaði um 25% frá því fyrir ári og nam 13,8 milljörðum dala sem er besta afkoma félagsins frá upphafi á fyrsta ársfjórðungi. Heildartekjur Apple jukust um 16% og námu 61,1 milljarði dala. 

Greinendur höfðu verið uggandi um afkomu fyrirtækisins á fyrsta ársfjórðungi vegna óvissu um hversu vel gengi að selja iPhone X síma félagsins. Í ljós kom að iPhone X var söluhæsti sími félagsins allar vikur fjórðungsins. Eftir uppgjörið hefur hlutabréfaverð Apple hækkað um 2,3%.