Í marsmánuði voru 623 kaupsamningum um fasteignir þinglýst við sýslumannsembættin á höfuðborgarsvæðinu. Nam heildarveltan 31,5 milljörðum króna og var meðalupphæðin á hvern kaupsamning um 50,5 milljónir króna að því er Þjóðskrá greinir frá.

Viðskipti með eignir í fjölbýli nam 21 milljarði, viðskipti með eignir í sérbýli 7,6 milljörðum og viðskipti með aðrar eignir 2,8 milljörðum króna.

Þegar mars 2018 er borinn saman við febrúar 2018 fjölgar kaupsamningum um 26,4% og velta eykst um 15,3%. Í febrúar 2018 var 493 kaupsamningum þinglýst, velta nam 27,3 milljörðum króna og meðalupphæð á hvern kaupsamning 55,4 milljónir króna.

Þegar mars 2018 er borinn saman við mars 2017 fækkar kaupsamningum um 19,7% og velta minnkar um 11,9%. Í mars 2017 var 776 kaupsamningum þinglýst, velta nam 35,7 milljörðum króna og meðalupphæð á hvern kaupsamning 46 milljónir króna.

Makaskiptasamningar voru 8 í mars 2018 eða 1,3% af öllum samningum. Í febrúar 2018 var 1 makaskiptasamningur eða 0,2% af öllum samningum. Í mars 2017 voru makaskiptasamningar 17 eða 2,4% af öllum samningum.