Kaupþing hefur sett 10% hlutafjár í Arion banka í söluferli og miðað við markaðsverðmæti Arion í Kauphöllinni eru bréfin að verðmetin á um 15 milljarða króna. Kaupþing er stærsti hluthafi Arion banka og fer með tæplega þriðjungshlut í bankanum.

Greint er frá þessu á vef Fréttablaðsins þar sem kemur jafnframt fram að bandaríski fjárfestingabankinn Citi, sænska verðbréfafyrirtækið Carnegie og Fossar markaðir séu ráðgjafar Kaupþings við söluna.

Sala bréfanna hófst í dag með svokölluðu tilboðsfyrirkomulagi og voru 200 milljónir hlutir að nafnverði boðnir til sölu í gegnum fjárfestingabanka og verðbréfafyrirtæki til fjárfesta á svipuðu verði og skráð er í Kauphöllinni.

Fréttablaðið greinir jafnframt frá því að Kaupþing og vogunarsjóðurinn Attestor Capital, sem fer núna með 7,15 prósenta hlut í Arion banka, hafi selt um 29 prósenta hlut í hlutafjár¬útboði bankans í júní í fyrra. Við skráningu Arion banka í kjölfarið á hlutabréfamarkað í Svíþjóð og á Íslandi var Kaupþingi, ásamt Att¬estor, Taconic Capital, Och-Ziff Capital og Goldman Sachs, óheimilt að eiga viðskipti með bréf sín í bankanum í sex mánuði. Þeim söluhömlum lauk 20. desember síðastliðinn.

Við sölu Kaupþings á tveggja prósenta hlut eða meira í Arion banka muni vogunarsjóðunum og Goldman Sachs bjóðast að koma inn í þau viðskipti og selja á sama gengi í hlutfalli við skráða eignarhluti þeirra í bankanum. Það er á grundvelli samkomulags sem Kaupþing og aðrir stærstu hluthafar Arion banka gerðu með sér um skipulegt söluferli eftir að söluhömlum yrði aflétt, að því er Fréttablaðið greinir frá.