Kínversk stjórnvöld samþykktu í gærkvöldi að hækka tolla upp í allt að 25% á 128 innflutningsvörur frá Bandaríkjunum. Tollarnir taka gildi í dag. Frosið svínakjöt, vín, ávextir og hnetur eru meðal þeirra vara sem tollarnir ná til. Reuters greinir frá .

Um er að ræða andsvar Kínverja við ákvörðun Donalds Trump, Bandaríkjaforseta, að leggja 25% verndartoll á innflutt stál og 10% toll á innflutt ál. Gagntollar Kínverja, sem kynntir voru í síðasta mánuði og samþykktir í gærkvöldi, nema um 3 milljörðum Bandaríkjadala.

Bandaríkjaforseti kynnti jafnframt í síðasta mánuði refsitolla , sem taka brátt gildi, á yfir þúsund innflutningsvörur frá Kína upp á 50-60 milljarða dollara og takmarkanir á fjárfestingum Kínverja í Bandaríkjunum vegna hugverkaþjófnaðar þeirra þar í landi. Þar áður hafði Bandaríkjaforseti kynnt háa tolla á innflutta sólskildi og þvottavélar, sem bitna helst á innflutningi frá Kína. Trump-tollarnir svokölluðu hafa verið rökstuddir út frá því að þeir eigi að vernda bandaríska framleiðslu, rétta af viðskiptahalla Bandaríkjanna og auka atvinnustigið í landinu.

Kínversk stjórnvöld hafa sagst reiðubúin að svara tollum Trumps með  „nauðsynlegum aðgerðum“, en hingað til hafa mótvægisaðgerðirnar verið takmarkaðar. Tollarnir sem Kínverjar samþykktu í gærkvöldi eru til að mynda ekki andsvar við refsitollum Bandaríkjanna.

Bandaríkin og Kína eru tvö stærstu hagkerfi heims. Útflutningsdrifinn hagvöxtur í Kína er mjög háður útflutningi til Bandaríkjanna, en Kína er stærsti lánardrottinn bandaríska ríkisins.