Kínverski rafbílaframleiðandinn NIO hefur hafið hlutafjárútboð, og hyggst skrá sig í kauphöllina New York Stock Exchange eftir um það bil tvær vikur, samkvæmt frétt Wall Street Journal .
NIO, sem hefur lýst sér sem samkeppnisaðila Tesla, býður nú út 160 milljón hluti í félaginu fyrir á bilinu 6,25 og 8,25 Bandaríkjadali á hlut. Félagið gæti þannig aflað allt að 1,3 milljörðum dollara, sem samsvarar 8,5 milljarð dollara heildarmarkaðsvirði.
Útboðið er þó minna en upphaflega var lagt upp með. Markmið NIO fyrr á árinu var að ná að minnsta kosti 2 milljörðum dollara.
Fyrirtækið hóf sölu á sínum fyrsta bíl – 7 sæta rafknúnum jeppa – undir lok síðasta árs, og hafði afhent tæp 500 eintök í lok júlí. Í útboðsgögnunum kom fram að pantanir á bílnum næmu hátt í 16 þúsund eintökum, og að til standi að hefja framleiðslu minni jepplings á árinu, og byrja afhendingu á fyrri hluta ársins 2019.
Félagið hefur ekki enn skilað hagnaði, en hafði 7 milljónir dollara í tekjur á fyrri hlemingi þessa árs, og tapaði rúmum 500 milljónum.
