KPMG Global Infrastructure hefur valið sæstreng milli Íslands og Bretlands meðal 100 eftirtektarverðustu verkefna á sviði uppbyggingar. Verkefnin eru á mismunandi stigum, allt frá hugmyndum yfir í verkefni í fullri framkvæmd. Gunnar Tryggvason, sérfræðingur í orkumálum hjá KPMG, segir listann vekja athygli á innviðauppbyggingu sem hafi jákvæð áhrif.
Ritið frá KPMG er gefið út á tveggja ára fresti en þetta er í fyrsta skipti sem innviðaverkefni á Íslandi er á þessum lista. Í umsögn um verkefnið segir að Ísland framleiði alla sína raforku með endurnýjanlegum auðlindum og hafi kost á að framleiða mun meiri orku en þörf er á á almennum markaði. Fjárfesting í strengnum og orkumannvirkjum á Íslandi gæti orðið að stærðargráðunni 5 milljarðar Bandaríkjadala og strengurinn gæti flutt út 5 terawatt stundir á ári af endurnýjanlegri raforku til Bretlands.
Gunnar var formaður nefndarinnar sem vann skýrslu um lagningu sæstrengs til Evrópu fyrir iðnaðarráðuneytið. Skýrslunni var lokið síðasta sumar og segir Gunnar vinnuna í framhaldi hafa gengið hægar en vonast var til. „Hópurinn lagði mikla áherslu að fá frekari upplýsingar og þá sérstaklega frá breskum stjórnvöldum hvað myndi fást fyrir orkuna. Það var aðalforsendan sem vantaði inn í myndina. Við lögðum áherslu á það en voðalega lítið hefur gerst.“
