*

þriðjudagur, 23. október 2018
Fólk 1. október 2009 05:00

Kristín A. Árnadóttir verður sendiherra í Kína

Gunnar Snorri Gunnarsson fer til Berlínar

Ritstjórn

Kristín A. Árnadóttir, sendiherra og skrifstofustjóri á upplýsingaskrifstofu utanríkisráðuneytisins, verður sendiherra í Kína um áramótin, samkvæmt heimildum Viðskiptablaðsins. 

Hún tekur við Gunnari Snorra Gunnarssyni sendiherra.

Hann mun verða fluttur til Berlínar þar sem Ólafur Davíðsson hefur verið sendiherra í nokkur ár. Ólafur fer á eftirlaun 1. janúar næstkomandi.

Frekari breytingar eru á döfinni í utanríkisþjónustunni.

Stefán Skjaldarson, sendiherra á viðskiptasviði utanríkisráðuneytisins, verður sendiherra í Vín í stað Sveins Björnssonar sem fer á eftirlaun. Þá fer Elín Flygenring, fastafulltrúi Íslands hjá Evrópuráðinu, til Helsinki og verður þar sendiherra, en þar er fyrir Hannes Heimisson sem kemur heim í utanríkisráðuneytið.

Sem kunnugt er hefur starf fastafulltrúa Íslendinga hjá Evrópuráðinu verið lagt niður vegna niðurskurðar í utanríkisþjónustunni.

Kristín A. Árnadóttir var gerð að sendiherra í nóvember 2008, í utanríkisráðherratíð Ingibjargar Sólrúnar Gísladóttur. Hún stjórnaði áður framboði Íslands til Öryggisráðs Sameinuðu þjóðanna. Þar áður stýrði hún skrifstofu borgarstjórans í Reykjavík.

Frá þessu er greint í Viðskiptablaðinu í dag.