Peningastefnunefnd Seðlabanka Íslands hefur ákveðið að lækka stýrivexti um 0,25% og verða meginvextir bankans, það er vextir á sjö daga bundnum innlánum, því 4,50%. Þetta kom fram í ákvörðun peningastefnunefndar sem birt var rétt í þessu, en nefndin fundaði í dag af tilefni stýrvaxtarákvörðunardags. Þetta er því önnur vaxtalækkunin á tiltölulega stuttum tíma en vextir voru lækkaðir um 0,25% fyrir tæpum mánuði.

Peningastefnunefnd Seðlabanka Íslands bendir meðal annars á að verðbólguvæntingar bæði til skamms og langs tíma hafi lækkað áfram frá síðasta fundi peningastefnunefndar og að raunvextir hafi hækkað. Þó bendir bankinn jafnframt á að skýr merki séu um spennu í þjóðarbúskapnum sem kalli á peningalegt aðhald.

Hægt er að lesa yfirlýsingu nefndarinnar hér:

„Horfur eru á hröðum hagvexti í ár eins og árin á undan. Útlitið hefur lítið breyst frá síðustu spá Seðlabankans og hagvöxtur á fyrsta ársfjórðungi var í meginatriðum í samræmi við hana. Vöxturinn er sem fyrr einkum drifinn af örum vexti ferðaþjónustu og einkaneyslu auk þess sem útlit er fyrir töluverða slökun í aðhaldi opinberra fjármála í ár.

Verðbólga er enn áþekk því sem hún hefur verið sl. hálft ár en undirliggjandi verðbólga virðist hafa minnkað undanfarna mánuði. Þá hafa verðbólguvæntingar til bæði skamms og langs tíma lækkað áfram frá síðasta fundi peningastefnunefndar og raunvextir bankans hækkað. Gagnstæðir kraftar hafa sem fyrr áhrif á verðbólguhorfur, þar sem hækkun gengis krónunnar og lítil alþjóðleg verðbólga vega á móti verðbólguþrýstingi af innlendum rótum. Hefur bilið á milli verðþróunar innlendra þátta, einkum húsnæðiskostnaðar, og erlendra þátta aukist töluvert undanfarna mánuði.

Skýr merki um spennu í þjóðarbúskapnum kalla á peningalegt aðhald svo að tryggja megi verðstöðugleika til meðallangs tíma. Hækkun raunvaxta bankans frá síðasta fundi peningastefnunefndar felur hins vegar í sér nokkru meira aðhald en nefndin hafði stefnt að og telur nægilegt til þess að stuðla að verðstöðugleika.

Traustari kjölfesta verðbólguvæntinga við verðbólgumarkmiðið og hækkun gengis krónunnar hafa gert peningastefnunefnd mögulegt að ná lögboðnu markmiði um verðstöðugleika með lægri vöxtum en ella. Aðhaldsstig peningastefnunnar á komandi misserum mun ráðast af framvindu efnahagsmála og annarri hagstjórn,“ segir í yfirlýsingu frá Seðlabanka Íslands.