Aðeins 21% af veiðigjöldum kemur frá höfuðborgarsvæðinu en restin, 79%, kemur frá sjávarútsvegsfyrirtækjum á landsbyggðinni. Það samsvarar því að tæplega fjórir fimmtu veiðigjaldsins leggist á landsbyggðina að því er kemur fram í umfjöllun á vef Samtaka fyrirtækja í sjávarútvegi (SFS). Í umfjöllun SFS segir að ekki verði dregin önnur ályktun en sú, að hækkað veiðigjald muni hafa meiri og afdrífaríkari áhrif á landsbyggðina en höfuðborgarsvæðið.
Þá segir jafnframt að skattar og gjöld leggist misjafnlega á sveitarfélög. Sum sveitarfélög, líkt og Selfoss, muni ekki sérlega mikið um hvort veiðigjald sé hækkað eða lækkað en annað sé uppi á teningnum þar sem sjávarútvegsfyrirtæki eru burðarás í samfélaginu.
Bolungarvík er eitt slíkt dæmi en í nýlegri úttekt sem gerð var fyrir sveitarfélagið kemur fram að veiðigjald sem leggst á fyrirtæki í sveitarfélaginu sé áætlað um 311 milljónir króna. Samkvæmt tölum Hagstofu Íslands búa 888 manns í Bolungarvík sem samsvarar því að sjávarútvegsfyrirtæki staðarins greiði 350 þúsund krónur í veiðigjöld á hvern íbúa. Í umfjöllun SFS er rætt við Jón Pál Hreinsson bæjarstjóra í Bolungarvík sem segir að hækkun veiðigjalda yrði samfélaginu þungbær.
„Ég er mjög hugsi yfir því hvaðan þeir peningar eiga að koma. Ekki verða þeir teknir af framlegð fyrirtækjanna eins og hún er í dag. Ég get ekki séð annað en hún verði þá tekin með því að draga saman í kostnaði, fækka störfum, minnka þjónustu, hætta allri þróun og hætta að sækja fram. Ég sé ekki annað en að þetta samfélag sem ég stýri sé að fara að borga fyrir þetta dýrum dómum,“ segir Jón Páll.