Í lok 4. ársfjórðungs 2017 bjuggu alls 348.580 manns á Íslandi, 177.680 karlar og 170.910 konur. Landsmönnum fjölgaði um 1.840 á ársfjórðungnum. Á höfuðborgarsvæðinu bjuggu 222.590 manns en 126.000 utan þess að því er Hagstofan greinir frá.

Alls fæddust 1.020 börn á 4. ársfjórðungi, en 550 einstaklingar létust. Á sama tíma fluttust 1.390 fleiri einstaklingar til landsins en frá því. Í heildina nemur fjölgunin frá fyrra ári 10.100 manns, en í lok árs 2016 bjuggu 338.450 í landinu.

Unga fólkið flytur enn frá landinu

Aðfluttir einstaklingar með íslenskt ríkisfang voru 110 umfram brottflutta, og var aldurskipting þeirra nokkuð jöfn fyrir utan aldurshópinn 20-29 ára en það var eini aldurshópurinn þar sem fleiri fluttust frá landinu en til þess. Aðfluttir erlendir ríkisborgarar voru 1.280 fleiri en þeir sem fluttust frá landinu og voru 520 af þeim á þrítugsaldri.

Danmörk var helsti áfangastaður brottfluttra íslenskra ríkisborgara en þangað fluttust 140 manns á 4. ársfjórðungi. Alls fluttust 500 íslenskir ríkisborgarar frá landinu og af þeim fluttust 270 til Danmerkur, Noregs og Svíþjóðar. Flestir aðfluttir íslenskir ríkisborgarar komu frá Danmörku, eða 190, Noregi eða 140 og Svíþjóð, eða 100, samtals 430 manns af 610.

Flestir koma frá Póllandi og Litháen

Pólland var upprunaland flestra erlendra ríkisborgara en þaðan fluttust 890 til landsins af alls 2.470 erlendum innflytjendum.

Litháen kom næst, en þaðan fluttust 250 erlendir ríkisborgarar til landsins. Í lok fjórða ársfjórðungs bjuggu 37.950 erlendir ríkisborgarar á Íslandi.