Síminn hefur styrkt stöðu sína í Íslenska sjónvarpsfélaginu sem á og rekur Skjá einn. Viðskiptabanki Símans hefur undanfarna daga keypt nokkra smærri hluti í félaginu, auk þess sem Síminn er í viðræðum við ýmsa aðra hluthafa um samstarf í félaginu. Þá er í vændum innkoma nýrra fjárfesta í hin gagnvirku sjónvarpsáform sem Síminn leiðir - sem Skjár einn og enski boltinn leika lykilhlutverk í. Sem kunnugt er festi Síminn nýlega kaup á sýningarréttinum á enska boltanum og á fjórðungshlut í Íslenska Sjónvarpsfélaginu.
Í tilkynningu til Kauphallarinnar kemurfram að Síminn vill með hinum nýju aðgerðum tryggja áframhaldandi starfsemi Skjás 1, sem sjálfstæðrar stöðvar, og þar með gæta að aðgangi Símans að gæðaefni til stafrænnar dreifingar um fjarskiptakerfi Símans. Framtíðin efnis og fjarskipta liggur á stafrænum vettvangi en markmiðið með kaupum Símans á enska boltanum og í Skjá einum var einmitt að stuðla að því að efld fjarskiptakerfi Símans nýtist um land allt og skili góðum arði til eiganda félagsins.
