Tilnefningarnefnd Haga leggur til að óbreytt stjórn verði kjörin á aðalfundi sem fram fer í júní. Sitjandi stjórn var kjörin á hluthafafundi í upphafi árs. Þetta kemur fram í tilkynningu til Kauphallarinnar.

Stjórnina skipa nú Erna Gísladóttir, Davíð Harðarson, Eiríkur S. Jóhannsson, Katrín Olga Jóhannesdóttir og Stefán Árni Auðólfsson. Aðrir frambjóðendur til stjórnar eru Björgvin Halldór Björnsson, Guðrún Ólafsdóttir, Helgi Bjarnason og Már Wolfgang Mixa.

Sem fyrr segir var ný stjórn kjörin í upphafi árs en þá urðu nokkrar breytingar sem fólust í að Kristín Sigurgeirsdóttir, þá formaður, og Sigurður Arnar Sigurðsson, varaformaður, ákváðu að gefa ekki kost á sér til áframhaldandi setu. Á þeim fundi var Jón Ásgeir Jóhannesson í framboði til stjórnar en tilnefningarnefnd lagði ekki til að hann væri kjörinn og hlaut hann ekki kosningu.