Haraldur Benediktsson, þingmaður Sjálfstæðisflokks og nefndarmaður í fjárlaganefnd, hefur sent fjármálaráðherra formlega kvörtun vegna símtals Guðmundar Árnasonar ráðuneytisstjóra. Ráðuneytisstjórinn á að hafa hótað Haraldi æru- og eignamissi.
Í nýlegri yfirlýsingu, greindi Haraldur frá símtalinu, sem barst í heimasíma hans að kvöldi til. Guðmundur á að hafa krafist upplýsinga um afstöðu til skýrslu Vigdísar Hauksdóttur og Guðlaugar Þórs um einkavæðingu bankanna.
Í yfirlýsingunni segir m.a:
"Símtalið mun ég ekki rekja frekar. En skilaboð ráðuneytisstjórans voru skýr. Ætlun hans um að draga til ábyrgðar þá þingmenn sem tækju þátt í afgreiðslu skýrslunnar var augljós með beinni hótun um að þeir skyldu þola æru- og eignamissi."
Haraldur segir símtalið óboðlegt, óviðeigandi og grafalvarlegt. Haraldur hefur, í samræmi við ráðleggingar umboðsmanns Alþingis, skrifað fjármálaráðherra formlegt kvörtunarbréf. Í umræddu bréfi skrifar Haraldur:
„ Ummæli ráðuneytisstjórans voru ósamboðin stöðu hans og virðingu sem æðsta embættismanns fjármála- og efnahagsráðuneytisins.
Ég sé mig tilneyddan með bréfi þessu að leggja fram formlega kvörtun yfir framkomu ráðuneytisstjórans og jafnframt að fara fram á að farið verði yfir mál hans og brugðist við eftir atvikum í samræmi við réttindi hans og skyldur, samkvæmt viðeigandi lögum“