Danski leikfangaframleiðandinn Lego hefur gefið út tilkynningu sem ætti að valda mörgu foreldrinu hugarangri. Eftirspurn eftir leikfangakubbunum er svo mikil að framleiðsluarmur fyrirtækisins getur ekki annað henni. Þetta gæti valdið Lego-skorti í Evrópu um jólin.

Sala á Legokubbum jókst um 18% á fyrri helmingi ársins frá sama tímabili í fyrra, meðal annars vegna vinsælda Lego kvikmyndarinnar, sem og kubbakassa sem tengdir eru vinsælum kvikmyndum eins og Avengers og Star Wars.