Leigutekjur fasteignafélagsins Reita jukust um 6,5% á fyrstu níu mánuðum þessa árs og er að langstærstu leyti tilkominn vegna hækkaðrar leigu og betri nýtingar í óbreyttu eignasafni.. Þetta kemur fram í árshlutareikningi félagsins.

Leigutekjur fyrstu níu mánuði ársins 2018 námu 8.455 milljónir króna samanborið við 7.942 milljónir króna á sama tímabili árið áður. Nýting eignasafnsins er 97,2% samanborið við 96,0% á sama tímabili í fyrra.

Virði fjárfestingareigna hækkaði um 7.056 milljónir króna á fyrstu níu mánuðum ársins. Matsbreyting fjárfestingareigna á tímabilinu nam 731 milljónir króna. Verðlagsbreytingar hafa þar áhrif til hækkunar en fasteignagjaldahækkanir til lækkunar. Nettó fjárfesting Reita í nýjum og núverandi eignum nam 6.501 milljónir króna á fyrstu níu mánuðum ársins.

„Rekstur Reita hefur verið með góðu móti undanfarin misseri. Tekjur hafa vaxið umfram verðlag og rekstrarhagnaður verið ágætur. Kaup á Vínlandsleið ehf. gengu í gegn í septemberbyrjun, þá bættust rúmlega 18.000 fermetrar af vönduðu húsnæði við eignasafn Reita sem telur nú 465.000 fermetra í um 135 byggingum. Af nýlegum leigusamningum ber helst að nefna tvo samninga sem gerðir voru við Landspítala á dögunum, annarsvegar nýr samningur um 5.000 fermetra skrifstofuhúsnæði við Skaftahlíð 24, og hinsvegar um húsnæði við Eiríksgötu 5, hús sem hýst hefur skrifstofur spítalans en verður nú breytt í göngudeild. Útleiga hefur verið góð að undanförnu og útleiguhlutfall er hátt. Stjórnendur Reita sjá fjölmörg tækifæri í stafrænni þróun og samþættingu hennar við hefðbundið verslunarhúsnæði. Kringlan ætlar í framtíðinni að þjóna viðskiptavinum með heildstæðri nálgun þar sem netheimar og raunheimar renna saman í eitt. Vinna er þegar hafin við þessar breytingar en þær fara að verða sýnilegri á næsta ári," segir Guðjón Auðunsson, forstjóri Reita.