Nú hafa tölvuþrjótar brotist inn í tölvukerfi bandaríska varnarmálaráðuneytisins og stolið viðkvæmum persónuupplýsingum um allt að 20 þúsund starfsmenn bandarísku alríkisþjónustunnar FBI.

Þrjótarnir birtu upplýsingarnar á netinu í gær og gortuðu sig af því á Twitter. Meðal þess sem stolið var úr gagnagrunni ráðuneytisins voru nöfn, titlar og símanúmer starfsfólksins, auk netfanga.

Talsmaður ráðuneytisins sagði að ekki liti út fyrir að aðrar upplýsingar sem gætu jafnvel verið viðkvæmari hafi lekið - upplýsingar á borð við kennitölur starfsfólksins.

Markmið tölvuþrjótanna var að vekja athygli á sambandi bandarísku ríkisstjórnarinnar við Ísrael, sem þeir gagnrýna harðlega. Þá notuðu þeir myllumerkið #FreePalestine í tístum sínum - svo ljóst er að um er að ræða eins konar pólitískan gjörning.