Líf Magneudóttir sækist eftir því að leiða lista Vinstri grænna fyrir komandi borgarstjórnarkosningar. Líf er borgarfulltrúi vinstri grænna og forseti borgarstjórnar en hún kom inn í borgarstjórn og borgarráð árið 2016 þegar Sóley Tómasdóttir sagði af sér.

„Ég býð mig fram til þess að leiða lista Vinstrihreyfingarinnar - græns framboðs í Reykjavík í borgarstjórnarkosningunum í lok maí. Stefna og sjónarmið Vinstri grænna eiga að vera í stafni þegar ákvarðanir eru teknar í borgastjórn og við daglega stjórnun borgarinnar næstu fjögur árin. Til þess þarf öflugan og samhentan hóp fólks til að vinna að sameiginlegum markmiðum sem hefur einkennt yfirstandandi kjörtímabil í núverandi meirihlutasamstarfi fjögurra flokka,“ segir Líf í tilkynningunni.

Hún segir jafnframt að stærstu viðfangsefni stjórnmálanna séu að bregðast við loftslagsbreytingum, uppræta kynbundið ofbeldi og útrýma efnahagslegu, félagslegu og öðru misrétti.

„Næstu ár eiga eftir að einkennast af örum vexti á öllum sviðum borgarinnar og við þurfum að setja kraft í að takast á við þá vaxtarverki sem fylgja stækkandi borg. Það verður gert með aukinni uppbyggingu húsnæðis, styrkingu almenningssamgangna, eflingu félagslegra- og efnahagslegra innviða með áherslu á þær stoðir sem varða börn og barnafjölskyldur. Þetta eru allt þættir sem snerta daglegt líf borgarbúa með einum eða öðrum hætti,“ segir Líf.

Líf er menntaður grunnskólakennara og er í sambúð með Snorra Stefánssyni lögmanni og hagfræðingi. Þau eiga fjögur börn á aldrinum 5-17 ára og búa í Vesturbæ Reykjavíkur.