Landsbankinn mun loka hraðbanka sínum á Stöðvarfirði og hefur þess í stað samið við eigendur Brekkunnar, veitingastaðar og verslunar í bænum, um reiðufjárþjónustu fyrir íbúa og ferðamenn. Þetta kemur fram í Morgunblaðinu í dag.
Íbúasamtök Stöðvarfjarðar eru ósátt við niðurstöðu bankans og hafa sent bankanum mótmælabréf. Málið var einnig tekið fyrir í bæjarráði Fjarðabyggðar á dögunum. Þar er tekið undir með íbúasamtökunum, það sé með öllu óásættanlegt að ekki skuli vera hraðbankaþjónusta á Stöðvarfirði.
Samkvæmt fréttinni hefur eini hraðbankinn á Eskifirði einnig verið lokaður en skv. upplýsingum bankans komu upp ítrekaðar bilanir í hraðbönkunum á Eskifirði og Stöðvarfirði. Sá síðarnefndi var úrskurðaður ónýtur og á Eskifirði er verið að leita að húsnæði undir nýjan hraðbanka.