Már Guðmundsson seðlabankastjóri átti að mæta á fund stjórnskipunar- og eftirlitsnefndar Alþingis klukkan tvö í dag ásamt Gylfa Magnússyni, formanni bankaráðs Seðlabankans, og Rannveigu Júníusdóttur, framkvæmdastjóra gjaldeyriseftirlits Seðlabankans.Tilefni fundarins var stjórnsýsla gjaldeyriseftirlits Seðlabankans og Samherjamálið. Búið er að fella fundinn niður og má telja líklegt að þar skipti væringar í íslenskum stjórnmálum talsverðu máli. Boðað hefur verið til ríkisráðsfundar klukkan fjögur í dag þar sem Sigríður Andersen mun láta af störfum sem dómsmálaráðherra.
Tryggvi Gunnarsson, umboðsmaður Alþingis, fór hörðum orðum um stjórnsýslu Seðlabankans við gjaldeyriseftirlit á fundi nefndarinnar í síðustu viku „Ég segi þetta líka til framtíðar, því það verður bara að vera alveg ljóst að svona gera menn ekki,“ sagði Tryggvi. Hann ritaði forsætisráðherra einnig nokkuð harðort bréf í síðustu viku þar sem fram kom að honum hefði borist upplýsingar um að starfsmenn Seðlabankans hefðu látið fréttamenn á RÚV vita af húsleit hjá Samherja árið 2012 áður en hún fór fram.
