Fjármála- og efnahagsráðuneytið hefur birt talna- og myndefni sem sýna kjaraþróun ljósmæðra. Greint er frá þessu á vef ráðuneytisins .
Fram kemur að á árinu 2017 störfuðu að meðaltali 252 ljósmæður hjá ríkinu í 172 stöðugildum. Meðalstarfshlutfall þeirra hjá ríki árið 2017 var 69% og aðeins um 14% ljósmæðra eru í fullu starfi en á tímabilinu 2007 til 2017 hefur stöðugildum ljósmæðra hjá ríkinu fjölgað um 33% en fæðingum fækkað um rúm 8%.
Árið 2008 fengu ljósmæður 16% hækkun umfram önnur BHM-félög sem leiðréttingu vegna viðurkenningar á aukinni menntun. Umrætt nám er 120 eininga sérhæft nám sem einstaklingar sem lokið hafa BS í hjúkrunarfræði geta tekið. Frá 2008 hafa ljósmæður fengið sömu hækkanir og önnur BHM-félög.
Meðaldagvinnulaun ljósmæðra miðað við fullt starf árið 2017 voru 573 þúsund krónur en meðalheildarlaun þeirra fyrir fullt starf sama ár voru 848 þúsund krónur á mánuði.
