*

laugardagur, 17. nóvember 2018
Innlent 27. apríl 2018 08:57

Meirihlutinn með minnsta mögulega mun

Samfylkingin, Píratar og VG fá 47% atkvæða, en þó meirihluta í borgarstjórn því 9,5% atkvæða falla dauð samkvæmt nýrri könnun.

Ritstjórn
Höskuldur Marselíusarson

Dagur B. Eggertsson verður áfram borgarstjóri ef ný skoðanakönnun Félagsvísindastofnunar fyrir Morgunblaðið reynist sannspá fyrir borgarstjórnarkosningarnar eftir minna en mánuð.

Samfylkingin, sem Dagur leiðir, ásamt samstarfsflokkum hans í borgarstjórnarmeirihlutanum fá minnihluta atkvæða, eða samanlagt 47% fylgi, en vegna dreifingar annarra atkvæða dugir það samt til að halda meirihlutanum. Í heild falla 9,5% atkvæða dauð.

Loks fær Viðreisn 5,3% til viðbótar, en flokkurinn starfaði áður í ríkisstjórn með Bjartri framtíð sem einnig styður núverandi meirihluta, en býður sig ekki fram á ný í borginni þó hann geri það með Viðreisn víða annars staðar. Það myndi duga fyrir einum manni til viðbótar við meirihlutann ef flokkurinn myndi semja í þá átt.

Aðrir flokkar fengju 10 menn

Framsóknarflokkurinn er ekki inni með mann samkvæmt þessari könnun, fær 2,8%. Sjálfstæðisflokkur, Miðflokkurinn og Flokkur fólksins fengju samanlagt 10 menn sem ekki dugir til að mynda meirihluta þeirra 23 sem munu sitja í henni eftir kosningar.

Þó munar litlu á að 8. maður sjálfstæðismanna felli annan mann Pírata, sem myndi fella núverandi meirihluta. Eyþór Arnalds oddviti og borgarstjórnarefni Sjálfstæðismanna segir þróunina síga í rétta átt. „Meirihlutinn gefur eftir smátt og smátt, hann hangir á minnsta mögulega mun og fellur á endanum,“ segir Eyþór.

Dagur segist ánægður með stöðuna þó hann telji að taka verði á spöðunum næstu vikurnar. „Ljóst er að það stefnir í jafnar kosningar.“

Fylgi flokkanna samkvæmt könnuninni skiptist þannig:

  • 30,5% og 8 borgarfulltrúar - Samfylkingin
  • 27,3% og 7 borgarfulltrúar - Sjálfstæðisflokkurinn
  • 9,7% og 2 borgarfulltrúar - Vinstri græn
  • 7,3% og 2 borgarfulltrúar - Miðflokkurinn
  • 6,8% og 2 borgarfulltrúar - Píratar
  • 6,7% og enginn borgarfulltrúi - ýmis önnur framboð
  • 5,3% og 1 borgarfulltrúi - Viðreisn
  • 2,8% og enginn borgarfulltrúi - Framsóknarflokkurinn