Verkefnaáætlun um hraðlest milli Keflavíkur og Reykjavíkur hefur verið færð af undirbúningsstigi yfir á skipulagsstig. Þá hefur verið komið á fót þróunarfélagi vegna framkvæmdarinnar og gengið frá samstarfssamningum við sveitarfélög á Suðurnesjum. Þetta kemur fram í erindi Kjartans Eiríkssonar, stjórnarformanns Fluglestarinnar, á ráðstefnunni Flutningslandið Ísland sem haldin var í Hörpu í dag og fjallað er um á mbl.is.
Samkvæmt erindi Kjartans er um að ræða einkaframkvæmd án aðkomu ríkisins og segir hann þegar mikinn áhuga fyrir verkefninu meðal erlendra fjármögnunaraðila. Gert er ráð fyrir að kostnaður við framkvæmdina nemi 758 milljónum evra eða sem nemur tæpum 100 milljörðum íslenskra króna.
Áætlað er að það taki hraðlestina um 15-18 mínútur að fara á milli Keflavíkurflugvallar og Reykjavíkur og að fimmtán mínútur verði á milli ferða. Hægt verður að ferja 2400 farþega á klukkustund.
