Árvakur sem er útgefandi Morgunblaðsins sem og miðlanna mbl.is og K100, tapaði 284 milljón króna á síðasta ári samanborið við 50 milljóna króna tap árið 2016. Þetta kemur fram í Morgunblaðinu.
Afkoma fyrir fjármagnsliði, skatta og afskriftir var neikvæð um 93 milljónir króna, en var jákvæð um 99 milljónir árið á undan.
Eiginfjárstaða er sögð sterk en eiginfjárhlutfallið var 39% í lok síðasta árs. Þá var nýlega lokið við hlutafjáraukningu upp á 200 milljónir króna.
Haraldur Johannessen, framkvæmdastjóri Árvakurs, segir að samkeppnin við Rúv hafi farið harðnandi vegna aukinna umsvifa þess. Þá hafi erlend samkeppni einnig harðnað mjög.
„Þar keppa innlendir miðlar við erlenda miðla sem búa við allt aðrar aðstæður, svo sem í skattalegu tilliti og í tækifærum til auglýsingasölu. Ennfremur hefur launakostnaður hér á landi hækkað ört og fyrir fyrirtæki þar sem sá liður vegur langsamlega þyngst í rekstrinum, þá er óhjákvæmilegt að það hafi veruleg áhrif. Hluti af tapi síðasta árs stafar þó einnig af því að við erum að byggja upp nýja starfsemi og sú uppbygging hefur kostað töluvert fé, en við gerum ráð fyrir að hún muni skila sér í auknum tekjum, meiri hagkvæmni og jákvæðri afkomu,“ segir Haraldur Johannessen, framkvæmdastjóri Árvakurs.