Greiningardeild Arion banka telur þá upp vísbendingar sem benda að mestu leyti til þess að vaxtastig muni fara lækkandi þegar fram í sækir, en þó er óvíst um að það gerist í bráð að mati Greiningardeildarinnar. Þættirnir sem Greiningardeildin bendir á er meðal annars að; Verðbólguvæntingar hafa lækkað, það að hagstæð skuldastaða lækki áhættuálag, það að þjóðin eldist og að sparnaður á Íslandi eykst, að hægja tekur á fólksfjölgun hérlendis og að lokum að framleiðnivöxtur sé hægur hér á landi. Hægt er að sjá ítarlega greiningu á málinu hér .

Mikil umræða hefur verið um það hversu lágir vextir eru á heimsvísu — bæði raunvextir og nafnvextir. Greiningardeild Arion banka fer yfir víðan völl í umfjöllun um ástæður þessa. Þar kemur meðal annars fram að: „Sumstaðar eru nafnvextir orðnir neikvæðir sem þýðir að lánveitendur borga fyrir að fá að lána peningana sína, á meðan lántakendur eins og ríki fá beinlínis greitt fyrir að skuldsetja sig. Þessi þróun er á öndverðu við það sem hefur verið kennt í hagfræði víða um heim svo ýmsir stjórnmála-, embættis- og fræðimenn hafa klórað sér hressilega í kollinum síðustu misseri.“

Í greiningu Arion er tekið fram að ástæður lækkandi vaxtastigs er hægt að skipta upp í tvennt; Annars vegar er hægt að tengja hana við lausa peningastefnu í mörgum iðnríkjum samhliða magnbundinni íhlutun í massavís. Hins vegar þá er hægt að benda á að lækkun stýrivaxta og ávöxtunarkröfu skuldabréfa séu eðlileg viðbrögð við undirliggjandi þróun í heiminum, þ.m.t. hægari framleiðnivexti, hægari fólksfjölgun og miklum sparnaði.

„Þó ekki sé fullljóst hvað veldur þróun síðustu ára er margt sem bendir til þess að hluti skýringanna felist í þróun undirliggjandi krafta í hagkerfum heimsins. En hvernig er þróun þeirra hér á landi? Eins og farið er yfir hér á eftir eru ýmsar vísbendingar sem hníga að því að raunvaxtastig á Íslandi fari lækkandi horft til framtíðar, þó að horfurnar til skamms tíma séu mun tvísýnni, einkum hvað varðar nafnvexti,“ segir í greiningu bankans.

Eins og kemur fram að hagstæðar efnahagshorfur og mikil fjárfestingarþörf haldi uppi vaxtastigi á Íslandi. „Í fyrsta lagi er talsverð framleiðsluspenna í hagkerfinu um þessar mundir sem bæði getur ýtt undir verðbólguþrýsting og gerir það að verkum að Seðlabankinn kýs að stefna á hærra raunvaxtastig en ella. Í öðru lagi er síður en svo lítið af fjárfestingartækifærum og víða stefnir í mikla uppbyggingu, sem eykur eftirspurn eftir fjármagni sem stuðlar að hærri vöxtum en ella. Krafturinn í hagkerfinu um þessar mundir gæti því leitt til þess að lægri vextir á Íslandi verði músík sem í bili heyrist eingöngu í fjarska,“ segir að lokum í greiningu bankans.