Almenni lífeyrissjóðurinn og Viðskiptablaðið héldu opinn fund um séreignarsparnað á Icelandair Reykjavík Hótel Natura í síðustu viku.

Efnt var til fundarins vegna breytinga sem gerðar hafa verið á lagaumhverfi séreignarsparnaðar. Nú geta einstaklingar, sem eru að kaupa sína fyrstu fasteign, notað viðbótarlífeyrissparnað í 10 ár til að safna skattfrjálst upp í útborgun eða inn á höfuðstól fyrstu fasteignar.

Einnig hefur verið gerð sú breyting að launþegar á almennum vinnumarkaði geta greitt 2% af launum (hækkar í 3,5% þann 1. júlí 2018) í svokallaða tilgreinda séreign sem er laus til útborgunar á aldrinum 62 til 66 ára. Einstaklingar geta valið að ávaxta tilgreindu séreignina hjá öðrum en þeim lífeyrissjóði sem viðkomandi er skyldugur að greiða til og geta því valið á milli fjölda ávöxtunarleiða.

Á fundinum var farið yfir þá kosti sem í boði eru. Gunnar Baldvinsson, framkvæmdastjóri Almenna lífeyrissjóðsins, flutti erindi sem og Helga Indriðadóttir, sjóðsstjóri hjá Almenna, og Sigríður Ómarsdóttir skrifstofustjóri. Á fundinum söng Sigríður Thorlacius nokkur lög við undirleik Guðmundar Arnar Guðmundssonar gítarleikara.

© Haraldur Guðjónsson (VB MYND/hag)

Trausti Hafliðason, ritstjóri Viðskiptablaðsins, stýrði fundinum.

© Haraldur Guðjónsson (VB MYND/hag)

Helga Indriðadóttir, sjóðstjóri hjá Almenna lífeyrissjóðnum, fjallaði um mismunandi ávöxtunarleiðir.

© Haraldur Guðjónsson (VB MYND/hag)

Sigríður Ómarsdóttir, skrifstofustjóri hjá Almenna lífeyrissjóðnum, fjallaði um nýjungar í þjónustu við sjóðfélaga.

© Haraldur Guðjónsson (VB MYND/hag)

Sigríður Thorlacius söng nokkur lög fyrir gesti.

© Haraldur Guðjónsson (VB MYND/hag)

Upplýsingafundurinn var vel sóttur og að erindum loknum sköpuðust skemmtilegar umræður í salnum.

© Haraldur Guðjónsson (VB MYND/hag)

Hannes G. Sigurðsson, aðstoðarframkvæmdastjóri Samtaka atvinnulífsins, var á meðal fundargesta.