Guðrún Ögmundsdóttir og Eggert Þröstur Þórarinsson eru nýir forstöðumenn á sviði fjármálastöðugleika Seðlabanka Íslands. Þetta kemur fram í frétt á vefsvæði Seðlabankans.
Guðrún Ögmundsdóttir hefur verið ráðin í stöðu forstöðumanns lausafjáráhættu og fjármálafyrirtækja. Guðrún er með meistarapróf í hagfræði frá Háskóla Íslands. Hún hóf störf í Seðlabanka Íslands árið 2004 en hefur starfað sem sérfræðingur á sviði fjármálastöðugleika frá árinu 2006.
Eggert Þröstur Þórarinsson hefur verið ráðinn í stöðu forstöðumanns þjóðhagsvarúðar. Hann mun jafnframt gegna stöðu aðstoðarframkvæmdastjóra fjármálastöðugleika. Eggert er með meistarapróf í fjármálum frá University of Cambridge í Bretlandi og meistarapróf í vélaverkfræði frá Háskóla Íslands. Eggert hefur starfað í Seðlabanka Íslands á sviði fjármálastöðugleika frá árinu 2010.
