Nýjársgleði kínversku þjóðarinnar var með rólegasta móti, að minnsta kosti hvað varðar efnisleg gæði. Neysla í viku löngu nýjársfríi Kínverja, vegna árs svínsins sem hófst 5. febrúar, nam 149 milljörðum dollara, um 18 þúsund milljörðum íslenskra króna sem er aukning um 8,5% milli ára. Þetta er hægasti neysluvöxtur yfir áramótahátíðina í Kína frá því mælingar hófust árið 2005 að því er FT greinir frá. Neysluvöxturinn nam 10,2% milli áranna 2018 til 2017.
Í nýársvikunni nær neysla Kínverja hámarki hvað varðar verslun, afþreyingu og veitingar. Eyðsla í ferðalög innanlands jókst um 8,2% á milli ára miðað við 12,6% vöxt árin þar á undan. Þá jókst sala kvikmyndahúsa um 1,3% á milli ára.
Neysla skiptir vöxt kínverska hagkerfisins sífellt meira máli. Hagvöxtur í fyrra nam 6,6% árið 2018 sem er lægsti hagvöxtur frá árinu 1990. Ríkisdagblaðið The Economic Information Daily, spáir 6% hagvexti á fyrsta ársfjórðungi þessa árs.
