*

þriðjudagur, 20. nóvember 2018
Innlent 4. janúar 2017 11:53

Nýr alþjóðlegur fjárfestingarsjóður Íslandssjóða

Íslandssjóðir hafa stofnað nýjan alþjóðlegan fjárfestingarsjóð. „Nú fá einstaklingar loksins tækifæri til þess að fjárfesta í erlendum verðbréfum ,“ segir framkvæmdastjóri Íslandssjóða.

Ritstjórn
Kjartan Smári Höskuldsson, framkvæmdastjóri Íslandssjóða.
Haraldur Guðjónsson

Íslandssjóðir hafa stofnað nýjan alþjóðlegan fjárfestingasjóð sem ber heitið Einkasafn Erlent og er sjóðurinn opinn fyrir alla sparifjáreigendur og fjárfesta.

„Sjóðurinn hentar sérstaklega vel fyrir þá sem eru að stíga sín fyrstu skref í erlendum fjárfestingum. Helstu fjárfestingar sjóðsins verða í alþjóðlegum verðbréfasjóðum, erlendum hlutabréfum, skuldabréfum og innlánum. Við stýringu sjóðsins er mikil áhersla lögð á góða eignadreifingu á alþjóðlegum mörkuðum,“ segir í tilkynningu frá Íslandssjóðum.

Loks hægt að fjárfesta erlendis

Þar er haft eftir Kjartani Smára Höskuldssyni, framkvæmdastjóri Íslandssjóða, í tilkynningunni að nú fá einstaklingar loksins tækifæri til að fjárfesta í erlendum verðbréfum í fyrsta sinn síðan gjaldeyrishöft voru sett á árið 2008. „Í átta ár hefur nær allur sparnaður íslenskra sparifjáreigenda verið í innlendum eignum, en hver einstaklingur hefur nú heimild til að fjárfesta erlendis fyrir allt að 100 milljónir króna. Í langtímasparnaði er eignadreifing mikilvæg og því er skynsamlegt að ráðstafa hluta sparnaðar í erlendar fjárfestingar. Söguleg ávöxtun sýnir einnig að vægi erlendra hlutabréfa eigi að vera að minnsta kosti jafnhátt og vægi innlendra hlutabréfa í blönduðu eignasafni.“