Þegar gluggað er í nýja Íslands-skýrslu Efnahags- og framfarastofnunarinnar (OECD) er nánast eins og höfundunum finnist ástandið vandræðalega gott, ekki síst þegar litið er til efnahagsþróunar í vestrænum hagkerfum undanfarin ár. Því þó að á Íslandi hafi orðið bankahrun hefur teygst óendanlega úr bankakreppunni í fjölmörgum þeirra landa, sem við berum okkur helst saman við.
Í skýrslunni er lýst efnahagsviðsnúningi eftirhrunsins, flugi ferðaiðnaðarins, uppgreiðslu opinberra skulda og víðtækri efnahagsuppbyggingu. Sé nú svo komið að í efnahagslegum skilningi hafi Íslendingar það betra nú en kortér í hrun.
Talið er að framtíðarhorfur í íslensku efnahagslífi séu góðar, en þó er varað við að í efnahagslífinu blundi enn ýmsir veikleikar. Það eigi einnig við á stjórnmálasviðinu, meirihlutinn sé tæpur og traust á helstu stofnunum enn af skornum skammti.
Hagvöxtur á Íslandi er sá mesti meðal ríkja OECD, en einnig er minnt á að lítil, opin hagkerfi eins og Íslands séu viðkvæm fyrir breyttum aðstæðum og hagsveiflur því miklar, þó að hagvaxtarskeiðið hafi verið afar langt að þessu sinni.
OECD segir þó að þrátt fyrir að horfur séu góðar sé töluverð hætta á ofhitnun. Bent er á að kjarasamningar hafi verið gerðir af nokkru örlæti undanfarin ár, en þrátt fyrir það vilji ýmis verkalýðsfélög sækja enn frekari kjarabætur. Stofnunin telur mikilvægt að auka aðhald í opinberum fjármálum og að peningastefnan þurfi að miðast við að bregðast megi við auknum verðbólguvæntingum.
Nánar má lesa um málið í Viðskiptablaðinu. Áskrifendur geta nálgast blaðið undir Tölublöð, aðrir geta gerst áskrifendur hér.
