Halldór Benjamín Þorbergsson framkvæmdastjóri Samtaka atvinnulífsins bendir á í nýrri grein muninn á stjórnmálunum hér heima og í Danmörku og vísaði þar í Lars Lökke Rasmussen forsætisráðherra Dana.

„Á fundi hans með fjórum fyrrverandi forsætisráðherrum landsins í Marenborg í sumar kom skýrt í ljós að þrátt fyrir ólíkar pólitískar áherslur og aðstæður á hverjum tíma stefndu þessir leiðtogar þriggja mismunandi flokka í raun allir að sama markmiði. Að gera Danmörku að sífellt betra landi. Það er rauði þráðurinn í danskri pólitík,“ segir Halldór.

„Ólíkt hafast þeir að dönsku og íslensku stjórnmálamennirnir kynni einhver að segja. En leiðtogi sósíaldemókrata Mette Fredriksen þakkaði á sama fundi stjórnendum fyrirtækjanna fyrir hugkvæmni sína og framkvæmdagleði, verðmæta framleiðslu sem renndi styrkum stoðum undir norræna velferðarríkið Danmörku. Stöðugt starfsumhverfi og skýrar leikreglur væri það sem stjórnmálamenn gætu boðið atvinnulífinu, það væri stjórnenda fyrirtækjanna að grípa þau fjölmörgu tækifæri sem væru til staðar.“

Hækkar rekstrarkostnað fyrirtækja

Halldór segir þann óstöðugleika sem nú ríki í íslenskum stjórnmálum vera skaðlegann, með tilheyrandi hærri rekstrarkostnaði fyrirtækja sem eiga erfiðara að gera áætlanir.

„Vextir verða einnig mun hærri en þeir þyrftu að vera. Fjárfestingar verða minni en ella og það sama á við um markaðssókn, vöruþróun og nýsköpun. Allir tapa á endanum, bæði fólk og fyrirtæki. Með öðrum orðum gætu lífskjör orðið enn betri en þau eru í dag með stöðugra stjórnarfari og meiri framsýni,“ segir Halldór og bendir á að farið sé að hægja á vexti í hagkerfinu.

„Niðurstöður kjarasamninga í vetur munu til að mynda ráða miklu um lífskjör Íslendinga á næstu misserum. Svigrúm til mikilla launahækkana er ekki til staðar og ljóst að ekki verður gengið mikið lengra í hagræðingu innan margra fyrirtækja eftir miklar launahækkanir síðustu misserin. Að auki hefur styrking gengis krónunnar dregið úr samkeppnishæfni fyrirtækja sem afla gjaldeyris.

Íslendingar eru í öfundsverðri stöðu og tækifærin mörg ef rétt er á málum haldið. Til að standa undir 3% hagvexti á Íslandi þarf að tvöfalda útflutning á næstu tuttugu árum. Það er aukning um 1.000 milljarða króna til 2037. En hvar verður þessu útflutningur til? Í hvaða fyrirtækjum og hvaða atvinnugreinum? Það er þúsund milljarða spurningin sem stjórnmálamenn og atvinnulífið þurfa að svara í sameiningu.“