Origo hagnaðist um 146 milljónir króna á þriðja ársfjórðungi sem er mikil aukning frá 28,5 milljóna króna hagnaði á sama tíma fyrir ári. Hagnaðurinn fyrstu 9 mánuði ársins nam 135 milljónum króna sem er nálega helmingslækkun frá 259,4 milljóna króna hagnaði á sama tíma fyrir ári.
Sala á vöru og þjónustu nam 3.744 milljónum króna á þriðja ársfjórðungi, sem er 6,5% tekjuaukning frá þriðja ársfjórðungi árið 2017. Framlegðin nam 1.071 milljónum króna á tímabilinu, eða 28,6%, en hún var 859 milljónir á sama tíma fyrir ári eða 24,4%.
EBITDA félagsins nam 369 milljónum króna en EBITDA hlutfallið var 9,8% á ársfjórðungnum, samanborið við 229 milljónir og 6,5% fyrir ári.
Sögulega besti fjórðungurinn
Finnur Oddson forstjóri Origo segir niðurstöðu þriðja ársfjórðungs vera yfir væntingum. „[O]g staðfestir þann stíganda sem hefur verið í rekstri samstæðunnar eftir því sem liðið hefur á árið,“ segir Finnur.
„Tekjur halda áfram að aukast og afkoma batnar frá öðrum ársfjórðungi. Niðurstaðan er einn besti rekstrarfjórðungur í sögu Origo samstæðunnar þegar horft er til hagnaðar fyrir afskriftir, fjármagnsliði og skatta.“
Eiginfjárhlutfall Origo var 40,4% í lok fyrstu níu mánaða ársins, en var 41,6% í árslok 2017. Tekjurnar fyrir fyrstu níu mánuðina námu 11.256 milljónum króna sem er 1,2% tekjuaukning frá sama tímabili fyrir ári þegar þær námu 11.112 milljónum króna.
Framlegð félagsins nam 2.988 milljónum króna eða 26,5% á fyrstu níu mánuðum 2018 en hún nam 2.739 milljónum króna fyrstu 9 mánuði ársins 2017, eða 24,6%. EBITDA félagsins var 705 milljónir króna, og EBITDA hlutfallið 6,3%, á fyrstu níu mánuðum 2018. Það er aukning frá 682 milljónum króna og 6,1% fyrstu níu mánuði ársins 2017.
Óstöðuleiki gæti skaðað samkeppnisstöðu
„Þessa jákvæðu þróun má að hluta rekja til áherslubreytinga í rekstri félagsins að undanförnu. Breytt skipulag og endurmörkun vörumerkis eru smám saman að skila sér í auknu hagræði, meiri skilvirkni og sterkari markaðsstöðu,“ segir Finnur jafnframt.
„Tekjur vaxa hjá öllum einingum á fjórðungnum og samsetning tekna er að þróast í rétta átt, þ.e. hærra hlutfall er vegna reglulegra tekna af hugbúnaðarsölu og þjónustu en verið hefur. Nýju nafni og vörumerki samstæðu hefur svo verið afar vel tekið, en “efst í huga” mælingar sýna að Origo er þegar orðið leiðandi vörumerki á íslenskum upplýsingatæknimarkaði, eitthvað sem við finnum fyrir á hverjum degi í starfsemi okkar, hvort sem horft er til sölu á notendabúnaði eða viðskiptalausnum. Rekstur dótturfélaga gengur vel, einkum hjá Tempo, sem skilaði miklum tekjuvexti og góðri afkomu á fjórðungnum.
Í byrjun október var gert samkomulag um áreiðanleikakönnun og einkaviðræður um sölu á 55% hlut í Tempo til Diversis Capital, fjárfestingafélags frá Los Angeles. Við höfum miklar væntingar til samstarfsins við Diversis, sem búa að víðtækri reynslu í uppbyggingu ört vaxandi tæknifyrirtækja. Þó svo viðræðum og áreiðanleikakönnun miði vel, og í raun mjög hratt, mun endanlegur frágangur kaupsamnings hliðrast inn í nóvembermánuð. Fyrirhuguð kaup miða við að heildarvirði Tempo sé 62,5 mUSD og að Diversis greiði Origo um 34,4 mUSD fyrir hlutinn.
Heilt yfir erum við mjög ánægð með hvert stefnir og væntum þess að tekjur vaxi áfram hóflega með viðunandi afkomu á næstu misserum. Enn hefur ekki náðst fram full samlegð í kjölfar sameiningar í upphafi árs, þar liggja heilmikil tækifæri til að þjóna viðskiptavinum betur og efla um leið rekstur félagsins. Félagið hefur sjaldan verið jafn vel í stakk búið til að ná til viðskiptavina og styðja þá í þeirri mikilvægu vegferð að nýta upplýsingatækni til að bæta árangur. Þar horfi ég sérstaklega til skilvirkara skipulags okkar og breiðara lausnaframboðs.
Þó að við séum almennt nokkuð bjartsýn á það sem er framundan hjá Origo, þá eru blikur eru á lofti í íslensku atvinnu- og efnahagslífi. Fjölmargir kjarasamningar eru lausir á komandi mánuðum og mikilvægt að samið verði með þeim hætti að það ýti ekki undir verðbólgu og óstöðugleika í hagkerfinu. Þannig myndi samkeppnishæfi fyrirtækja eins og Origo aðeins hraka og nauðsynlegt yrði að fara í erfiðari hagræðingarvinnu en annars þyrfti."
