Origo hefur keypt hugbúnaðarfyrirtækið Benhur. Markmiðði með kaupunum er að breikka lausnaframboð Origo á heilbrigðissviði en Benhur hefur sérhæft sig í hugbúnaðarlausnum fyrir rannsóknastofur.

Hugbúnaður Benhur kemur frá belgíska fyrirtækinu MIPS en hann hefur félagið selt og þjónustað í 14 ár. Landspítalinn hefur notað CLIMS rannsóknarstofukerfið og Cyberlab beiðna- og svarakerfi frá MIPS í fjölda ára. Innleiðing á kerfunum stendur einnig yfir á Sjúkrahúsinu á Akureyri. Þá er innleiðing á Erfða- og sameindalæknisfræðideild Landspítalans í undirbúningi.

Benhur varð hluti af Heilbrigðislausnum Origo frá og með 1. apríl. Þá gekk Skúli Barker, fyrrum eigandi Benhur, til liðs við Origo. Hann mun áfram sinna þjónustu og ráðgjöf fyrir notendur Clims og Cyberlab frá MIPS. Kaupin munu ekki hafa teljandi áhrif á rekstur og afkomu Origo.