*

mánudagur, 24. september 2018
Innlent 19. mars 2018 09:00

Óvissa eykst um hagvöxt í haust

Vísitala sem greina á efnahagsumsvif eftir sex mánuði stendur í stað í febrúar í fyrsta sinn eftir hálfs árs hækkun.

Ritstjórn
Yngvi Harðarsson hagfræðingur rekur ráðgjafafyrirtækið Analytica sem reiknar hagvísirinn
Haraldur Guðjónsson

Leiðandi hagvísir ráðgjafafyrirtækisins Analytica, sem á að gefa vísbendingu um efnahagsumsvif eftir hálft ár, stóð í stað í febrúar.

Hagvísirinn gefur samt sem áður áfram vísbendingu um að hagvöxtur aukist á ný snemma á þessu ári, enda hefur hann farið hækkandi undangengna sex mánuðina. 

En meiri óvissa ríkir þegar litið er fram til haustmánaða segir á heimasíðu fyrirtækisins. Hækkun varð í þremur af sex undirliðum hagvísisins, það eru erlend hlutabréf, magnvísitala fiskafla og innflutningur svo langtímauppleitni mikilvægra undirþátta er enn sterk.

Hins vegar geta áhættuþættir í ytra umhverfi ógnað hagvexti einkum þeir sem eru tengdir stöðunni í alþjóðastjórnmálum.

Með því að reyna að greina þætti í upphafi framleiðsluferlisins er hlutverk vísitölunnar að veita skýra sýn á efnahagshorfur og vara tímanlega við viðsnúningi í efnahagsumsvifum. 

Vísitalan er reiknuð á grundvelli sömu aðferða­fræði og annars staðar þar sem sambærilegar vísitölur eru reiknaðar en sérstaklega er tekið mið af verklagi OECD, segir á vef fyrirtækisins sem rekið er af Yngva Harðarsyni hagfræðingi.