*

mánudagur, 24. september 2018
Innlent 20. febrúar 2015 15:10

Óvissa um stóra erlenda fjárfestingu í Dalvíkurbyggð

Erlendur aðili vill fjárfesta í Dalvíkurbyggð fyrir um 17 milljarða en vantar raforku fyrir starfsemina.

Ritstjórn
Dalvík.
Haraldur Guðjónsson

Raforkuþörf Eyjafjarðar er um 100 megavött og fer vaxandi. Framleidd eru 8 megavött á svæðinu og er nauðsyn flutnings á raforku á svæðið æpandi. Þetta sagði Bjarni Th. Bjarnason, sveitarstjóri í Dalvíkurbyggð, á aðalfundi Samorku í morgun að því er fram kemur á vef samtakanna.

Þar greindi hann frá erlendum aðila sem hefur óskað eftir 10 megavöttum í atvinnuskapandi fjárfestingu í bæjarfélaginu sem skapa myndi um 120 ný störf og umtalsverðar tekjur fyrir sveitarfélagið. Sagði hann fjárfestinguna nema 17 milljörðum króna.

Hins vegar sé óvissa um verkefnið vegna takmarkana í flutningskerfi raforku. Hann sagði öfgahópa ekki mega stöðva uppbyggingu flutningakerfis raforku, og værukærir stjórnmálamenn, sveitarstjórnarfólk og hagsmunaaðilar væru sofandi á verðinum. 

Sagði Bjarni að leysa yrði málið hið fyrsta þar sem það þyldi enga bið.