Auglýsingastofan Pipar/TBWA hefur selt sinn hlut í Silent ehf. til Davíðs Lúthers Sigurðarsonar og á Davíð nú 100% hlutafjár í félaginu.
Hjá Silent vinna nú 8 manns og er fyrirtækið leiðandi í gerð kvikmyndaefnis fyrir netmiðla, heldur utan um alls kyns viðburði ásamt óhefðbundinni markaðssetningu. Davíð var annar af stofnendum fyrirtækisins árið 2011, en árið 2012 eignaðist Pipar stærstan hlut fyrirtækisins.
Í tilkynningu frá Pipar er haft eftir Valgeiri Magnússyni, framkvæmdastjóra fyrirtækisins að salan sé liður í að skerpa fókus fyrirtækisins en hann sjái fram á að vinna mjög mikið með Silent áfram.
Davíð Lúther segist mjög ánægður að hafa getað keypt til baka þann hlut sem hann seldi fyrir nokkrum árum. Silent hafi vaxið hratt á síðustu árum og áfram verði lagt kapp á að fyrirtækið verði leiðandi á sínu sviði.
