*

fimmtudagur, 15. nóvember 2018
Innlent 14. mars 2017 15:57

Píratar og Samfylking bæta við sig

Hlutfallslega jókst fylgi Samfylkingar um tíu af hundraði milli kannana. Stuðningur við ríkisstjórnina minnkar.

Ritstjórn
Birgir Ísl. Gunnarsson

Fylgi Sjálfstæðisflokksins mælist nú eilítið minna en í síðustu könnun MMR, eða 25,4% en í könnun fyrirtækisins frá 24. febrúar síðastliðinn mældist flokkurinn með 26,9% fylgi.

Fylgi Vinstri grænna mælist hins vegar nánast jafnmikið milli kannana og er það nú 23,5% en síðast var það 23,9%.

Píratar auka nokkuð við fylgi sitt milli kannana eða um 2,1 prósentustig en þeir mælast nú með 13,7% fylgi meðan Framsóknarflokkurinn dalar úr 12,2% niður í 11,4%.

Samfylkingin bætir eilítið við sig, og fer flokkurinn úr 8,0% fylgi í 8,8% fylgi, sem er þó fylgisaukning um tíu af hundraði á milli kannanna.

Viðreisn og Björt framtíð með 10,5% samanlagt

Viðreisn dalar milli kannana og er fylgi flokksins komið niður í 5,5% en það var 6,3% í síðustu könnun, en fylgi Bjartrar framtíðar mælist nú við þau mörk sem þarf til að komast inn á Alþingi, eða í 5,0% sem er lækkun um 0,2 prósentustig milli kannana. Samanlagt fylgi flokkanna er því 10,5% samkvæmt könnunni.

Flokkur fólksins, sem ekki komst inn á þing í síðustu þingkosningum, bætir við sig milli kannana og mælist flokkurinn nú í 3,7% fylgi en í síðustu könnun mældist flokkurinn í 2,4% fylgi.

Aðrir flokkar mælast sem hér segir, Dögun mælist í 1,5% fylgi, Íslenska þjóðfylkingin í 0,3% og svo aðrir flokkar í 0,1%.

Samanlagt mælist nú 34,5% stuðningur við ríkisstjórnina, sem er lækkun frá 37,9% í síðustu könnun. Könnunin fór fram dagana 6. til 13. mars síðastliðinn.