*

föstudagur, 21. september 2018
Innlent 13. febrúar 2018 17:06

Reginn hagnast um 3,7 milljarða

Hagnaður fasteignafélagsins dregst saman milli ára á sama tíma og rekstrartekjur þess aukast.

Ritstjórn
Helgi S. Gunnarsson, forstjóri Regins.
Haraldur Guðjónsson

Hagnaður fasteignafélagsins Regins dróst saman á milli áranna 2017 og 2016 að því er kemur fram í uppgjöri félagsins. Hagnaður á árinu 2017 nam 3.789 milljónum króna samanborið við 4.243 milljónir í fyrra.

Rekstrartekjur félagsins jukust þó á milli ára en árið 2017 voru þær 7.124 milljónir samanborið við 6.643 milljónir árið 2016. Mestu munar um matsbreytingu fjárfestingareigna en þær hækkuðu um 2.928 milljónir í ár samanborið við 3.745 milljónir í fyrra.

Hagnaður á hlut nemur því 2,41 krónu í ár. 

Eigið fé Regins í árslok 2017 var 34.652 milljónir og eykst um rúmlega fimm milljarða milli ára. Eiginfjárhlutfall félagins var því 34,8%.

Handbært fé Regins jókst um 455 milljónir á milli ára en í árslok 2017 nam það 1.343 milljónum króna. 

Á fjórða ársfjórðungi var rekstrarhagnaður Regins 1.826 milljónir króna sem er nokkuð minna en á þriðja ársfjórðungi þegar hagnaður félagsins nam 2.313 milljónum króna.