*

laugardagur, 17. nóvember 2018
Innlent 20. júlí 2018 09:01

Rekst ekki á áform um stækkun flugvallarins

Stefnt er að frekari uppbyggingu á svæðinu og meðal annars mun verslun, bensínstöð og bílaleiga opna.

Ritstjórn
Haraldur Guðjónsson

Nýtt 150 herbergja Courtyard flugvallarhótel Marriott keðjunnar mun ekki þrengja að framtíðar stækkunarmöguleikum flugvallarins þar sem það rís á lóð sem liggur utan við mörk yfirráðasvæðis Isavia.

Greint var frá því í gær hótelið myndi opna snemma á næsta ári. Fram kom við fyrstu skóflustungu h´telsins í gær að aðstandendur framkvæmdanna hyggi á uppbyggingu enn frekari þjónustu við flugvöllinn í kjölfar opnunarinnar.

Á lóðinni, sem gefið hefur verið nafnið Aðaltorg, kemur einnig til greina að opna matvöruverslun sem verði opin allan sólarhringinn. Þegar er komin þar ÓB eldsneytisstöð á vegum Olís og þá hafa bílaleigur, sem eru með starfsemi á flugvellinum, verið í óða önn að koma sér fyrir á nærliggjandi lóðum. Þar hafa þær fengið úthlutað meira landrými til að geyma og afhenda þúsundir bílaleigubíla sem ferðamenn notast við á ferðum sínum um landið.

Gert er ráð fyrir því að farþegar sem gisti á hótelinu eða þurfi að sækja bílaleigubíl ferðist í framtíðinni með sérstökum gjaldfrjálsum skutlum sem verði í áætlunarakstri frá flugstöðinni, en ferðin tekur á bilinu 2-4 mínútur. Slíkar skutlur eru algeng sjón við erlenda flugvelli.

Það var Rósa Ingvarsdóttir, framkvæmdastjóri Álftavíkur sem er leiðandi fjárfestir í verkefninu, sem tók fyrstu skóflustunguna með stórri beltagröfu í gær.