*

þriðjudagur, 25. september 2018
Fólk 14. maí 2018 11:17

Róbert Aron tekur við framkvæmdastjórn

Róbert Aron Róbertsson hefur verið ráðinn framkvæmdastjóri Fasteignaþróunarfélagsins Festis ehf.

Ritstjórn
Róbert Aron Róbertsson nýr framkvæmdastjóri Fasteignaþróunarfélagsins Festis var áður í stjórn félagsins.
Aðsend mynd

Fasteignaþróunarfélagið Festir ehf. hefur ráðið Róbert Aron Róbertsson sem framkvæmdastjóra en hann er öllum hnútum félagsins vel kunnugur sem stjórnarmaður þess til nokkurra ára. Róbert situr einnig í stjórn Festingar og Samskipa.

Róbert sem er viðskiptafræðimenntaður og hefur áunnið sér réttindi til verðbréfaviðskipta hóf árið 2007 störf fyrir Kjalar hf. Frá 2009 hefur Róbert sinnt fjölbreyttum verkefnum á sviði fjármálaráðgjafar, m.a. fyrir Festir, en reynsla Róberts mun skipta miklu máli fyrir félagið á komandi misserum.

Heimir Sigurðsson, stjórnarformaður Festis ehf. segir Róbert koma inn á góðum tímapunkti í félagið. „Róbert hefur starfað í stjórn félagsins um langt skeið og hefur yfirgripsmikla þekkingu á málefnum þess og getur leitt uppbygginguna næstu misserin,“ segir Róbert.

„Við stöndum á vissum tímamótum í starfsseminni með nokkur stór og viðamikil verkefni sem við hyggjumst byggja framtíð félagsins á. Inn í þá vinnu er reynsla Róberts dýrmæt því ég veit að hann hefur þann drifkraft sem þarf til að mæta verkefnum sem eru framundan í starfseminni.“

Byggja Vogabyggð, Héðinsreit og á Snæfellsnesi

Helstu verkefni Festis ehf. um þessar mundir eru uppbygging í Vogabyggð en þar eru byggingar í eigu Festis ehf., samtals um 7.000 fermetrar sem verða rifnar áður en framkvæmdir hefjast.

Þá tekur Festir þátt í viðamiklu verkefni við Héðinsreit en reiknað er með að framkvæmdir við um 200 íbúðir hefjist þar snemma á næsta ári en þegar hefur verið lagður mikill metnaður í undirbúning og hönnun. Festir á einnig Suðurlandsbraut 18 þar sem áform hafa verið uppi um stækkun.

Þá er Festir með verkefni á Snæfellsnesi sem hefur vakið mikla alþjóðlega athygli en það er Red Mountain Lagoon baðlónið sem yrði ferðaþjónustu á Vesturlandi mikil lyftistöng. Róbert hefur þegar tekið við störfum.