Ekkert skráð fyrirtæki á Íslandi á jafnmikið undir matvæla útflutningi til Rússlands og því hefur viðskiptabannið mest áhrif á Granda af öllum skráðum félögum. Þegar hálfsársuppgjör félagsins var kynnt gaf fyrirtækið það út að bannið hefði mikil áhrif á starfsemi félagsins, sérstaklega á Vopnafirði. Um 17% tekna HB Granda á síðasta ári komu frá rússneskum aðilum.
Velta HB Granda á fyrstu sex mánuðum ársins í fyrra nam 87,3 milljónum evra, en var 110,4 milljónir á fyrri helmingi þessa árs, sem er aukning upp á 26,5%. Verði veltan á öllu þessu ári í takt við þessa aukningu má búast við því að velta á ársgrundvelli verði um 270 milljónir evra. Gangi spáin um 10-15 milljóna evra tekjumissi vegna bannsins eftir væru það um 3,7%-5,6% af heildarveltu ársins. Ef miðað er við veltutölur síðasta árs nemur tekjumissirinn 4,6%-7,0% af heildarveltu.
Veiðin gekk vel
„Það var alveg ljóst að veiðin á tímabilinu gekk vel í samanburði við sama tíma í fyrra,“ segir Sveinn Þórarinsson hjá greiningardeild Landsbankans.
Nánar er fjallað um málið í fylgiriti Viðskiptablaðsins, Úr kauphöllinni, sem kom út síðasta fimmtudag. Áskrifendur geta nálgast pdf-útgáfu af blaðinu með því að smella á hlekkinn Tölublöð .
