Samtök ferðaþjónustunnar stóðu í gær fyrir fjölmennum fundi meðal félagsmanna sinna þar sem um var rætt fyrirhugaða hækkun ríkisstjórnarinnar á virðisaukaskatti í ferðaþjónustu.
Á fundinum var ályktun SAF um málið samþykkt. Þar kemur meðal annars fram að ef virðisaukaskattur verði tvöfaldaður eins og forystumenn ríkisstjórnarinnar hafa boðað mun það að sögn SAF hafa í för með sér grafalvarlegar afleiðingar fyrir fyrirtæki og starfsfólk í ferðaþjónustu um land allt.
Einnig er tekið fram í ályktuninni að afleiðingarnar verði alvarlegastar fyrir landsbyggðina sem á að sögn SAF. „
Mikil gengisstyrking og kostnaðarhækkanir stefna nú þegar afkomu fyrirtækja í greininni í mikla hættu. Með boðuðum skattahækkunum ríkisstjórnarinnar versnar samkeppnishæfni Íslands til mikilla muna. Ferðaþjónustan er grunnstoð í íslensku atvinnulífi og með óyfirveguðum aðgerðum ríkisstjórnarinnar er vegið að framtíðarmöguleikum greinarinnar og íslensku efnahagslífi,“ segir í ályktuninni.
SAF benda jafnframt á að ferðaþjónusta sé í eðli sínu alþjóðleg atvinnugrein og að íslensk ferðaþjónustufyrirtæki starfi því í samkeppni við erlenda áfangastaði. SAF segja að þau sem eru með gististaði í efri skattþrepum hafa lotið í lægra haldi við samkeppni við aðra áfangastaði. „Tillögur um hækkun á virðisaukaskatti vega þannig alvarlega að samkeppnishæfni Íslands,“ segir í ályktuninni.
Samtök ferðaþjónustunnar lýsa að lokum yfir miklum vonbrigðum með samráðsleysi stjórnvalda þegar kemur að eins umfangsmiklum breytingum og fyrirhugaðar hækkanir eru. Fjölmennur fundur Samtaka ferðaþjónustunnar skoraði því á ríkisstjórnina að hætta við áform um hækkun virðisaukaskatts á íslenska ferðaþjónustu.
