*

miðvikudagur, 19. desember 2018
Innlent 28. nóvember 2017 13:15

Sakar Björn um eineltistilburði

Oddviti VG sakar þingmann Pírata um „búllíisma“ fyrir að spyrja hana um yfirlýsingar um samstarf við íhaldið eftir kosningar.

Ritstjórn
Aðsend mynd

Líf Magneudóttir oddviti Vinstri grænna í borgarstjórn sakar Björn Leví Gunnarsson um eineltistilburði þegar hann spyr hana um fyrri yfirlýsingar um að gefa eigi íhaldinu langt frí frá ríkisstjórn.

Eins og Viðskiptablaðið hefur sagt frá stefnir allt í að ný ríkisstjórn Vinstri grænna, Sjálfstæðisflokksins og Framsóknarflokksins taki við stjórnartaumunum á fimmtudag, en orðin sem Björn Leví spyr Líf út í voru sett á facebook síðu hennar þann 29. október síðastliðinn, daginn eftir síðustu kosningar.

„En nei, þetta er víst búllíismi eða eitthvað. Af hverju grunar mig að allt komandi kjörtímabil verði nokkurn vegin svona?,“ segir Björn Leví og sýnir skjáskot af samræðum þeirra, þar sem hann spyr hvort rifja eigi upp orð hennar um væntanlegan samstarfsflokk flokks hennar í komandi ríkisstjórn.

„Ég var bara að spyrja hvað breyttist. Fólk má skipta um skoðun sko, mér finnst bara eðlilegt að fólk rökstyðji af hverju það gerir það (sérstaklega ef það er eitthvað sem heitir kosningar á milli þess sem fólk skiptir um skoðun).“ 

Tekur ásökuninni nærri sér vegna reynslu af einelti

Svar Lífar snýr ekki að málefnalegum ágreiningi heldur sakar hún hann um eineltistilburði og lýsir ógeði sínu á orðum hans, en hann segist taka ásökuninni nærri sér vegna mjög mikillar reynslu af einelti:

„vá hvað þetta er mikill búllíismi... oj,“ en Björn svarar:

„Fyrst þú eyddir nú út þræðinum á hinum staðnum. 

Ég er bara að spyrja um hvað breyttist? Er það búllíismi? Ath að ég hef mjög mikla reynslu af búllíum þannig að ég tek það nærri mér ef þú...“

Björn Leví segir færslu sína þar sem hann hafi spurt út í þetta hafa verið hent út og Líf hafa blokkað hann og honum hafa verið ómögulegt að „tagga“ líf í umræðunn. Síðan hefur hann uppfært færslu sína og segir hann nú að aðgangsstýringum færslunnar hafi verið breytt og af umræðum sem spinnst út af færslunni á vef Björns þar sem Líf blandar sér í umræðuna er ljóst að þau eru enn facebook vinir.

Þar segir hún ásökunina um einelti koma til af því að með því að setja færslu á þessi gömlu ummæli hennar sé Björn Leví óbeint að segja hvað hún sé glötuð að finnast eitthvað fyrir kosningar og daginn eftir.