*

fimmtudagur, 14. desember 2017
Innlent 1. desember 2017 09:05

Sama magn en minnkandi verðmæti

Aflaverðmæti íslenskra skipa dróst saman um 8,2% milli ára í ágúst, en 19,5% ef miðað er við 12 mánaða tímabil.

Ritstjórn
Haraldur Guðjónsson

Aflaverðmæti íslenskra skipa í ágúst voru tæplega 11,9 milljarðar króna sem er 8,2% minna en í ágúst 2016. Aflamagnið var tæplega 120 þúsund tonn sem er sama magn og í ágúst 2016 að því er Hagstofan greinir frá.

Verðmæti botnfiskaflans í ágúst nam 6,8 milljörðum króna sem er 2,4% aukning miðað við ágúst 2016. Þar af var verðmæti þorsks rétt rúmir 4 milljarðar sem er 6,5% verðmætaaukning. Verðmæti karfa var rúmur milljarður króna sem er 18,3% hærra en í ágúst í fyrra. 

Aflaverðmæti uppsjávartegunda nam tæpum 3,7 milljörðum samanborið við 4,9 milljarða í ágúst 2016, 24% samdráttur. Verðmæti flatfiskafla var 1,1 milljarður króna sem er um 11% aukning miðað við ágúst í fyrra. Verðmæti skelfiskafla voru tæpar 286 milljónir samanborið við 431 milljón í ágúst 2016.

Á 12 mánaða tímabili frá september 2016 til ágúst 2017 nam aflaverðmæti íslenskra skipa 110,8 milljörðum króna, sem er 19,5% samdráttur miðað við sama tímabil ári fyrr.