*

mánudagur, 22. apríl 2019
Innlent 20. ágúst 2017 10:09

Samruni líklega háður skilyrðum

Sérfræðingur hjá Samkeppnisráðgjöf segir ólíklegt að hindrun verði sett við sameiningar í ferðaþjónustu.

Ritstjórn
Haraldur Guðjónsson

Sameiningar Gray Line og Iceland Travel, auk kaupa Íslenskra fjallaleiðsögumanna á Arcada og Arctic Adventures á Extreme Iceland eru dæmi um auknar sameiningar í ferðaþjónustu hér á landi síðustu vikurnar. Viðskiptablaðið fjallaði um það fyrr í sumar að það stefndi í auknar sameiningar og var rætt við Helgu Árnadóttur framkvæmdastjóra Samtaka ferðaþjónustunnar sem sagði blikur vera á lofti í geiranum.

Eggert Ólafsson, sérfræðingur í samkeppnisrétti hjá Samkeppnisráðgjöf, sér ekki fram á að þær sameiningar sem hafi átt sér stað á undanförnum vikum í ferðaþjónustu eigi eftir að rekast á hindranir frá samkeppnisyfirvöldum, en hann bendir á að í fyrri sameiningum hafi verið sett skilyrði um upplýsingaflæði frá fyrirtækjunum til eigenda sinna.
„Aðaláhyggjuefnið er að stjórnarmenn séu óháðir og megi ekki sitja í stjórnum fjárstýringarfélaga eða aðila í tengdum rekstri,“ segir Eggert.

„Samkeppnislegu áhyggjuefnin eru að menn komist yfir viðkvæmar upplýsingar og þær leki yfir til keppinauta í gegnum eigendur, sem geti auðveldað samráð eða gefið fyrirtækjum forskot í samkeppni sín á milli.“

Aukin tæknivæðing

Jón Heiðar Þorsteinsson, markaðsstjóri Iceland Travel, segir að þó að ferðamannaiðnaðurinn sé almennt að stækka í heiminum þá ráðist val um ákvörðunarstað af svo mörgum þáttum. Tekur hann undir með þeim orðum Hrannar Greipsdóttur, framkvæmdastjóra Eldeyjar í viðtali við Viðskiptablaðið að Ísland eigi í samkeppni um ferðamennina.

„Við þekkjum það náttúrulega Íslendingar hvernig aukinn kaupmáttur hefur áhrif á okkar eigin ferðahegðun, það gildir nákvæmlega það sama í öðrum löndum,“ segir Jón Heiðar. „Ég held að almennt séð séu fyrirtæki að leita að hagkvæmni, til dæmis í því hvernig tæknin við bókunarkerfi og annað slíkt vinni með mönnum.“

Björgólfur Jóhannsson, forstjóri Icelandair Group, tekur í sama streng. „Við höfum verið að leggja áherslu á þessa stafrænu vinnu og sjáum tækifæri í því að minnka handavinnu í kringum bókanir og afgreiðslu mála,“ segir Björgólfur. „Það væri auðvitað jákvætt að þessar hendur sem eru að sinna þessu geti þá nýst í öðru sem aflar fyrirtækjunum tekjur.“

Nánar má lesa um málið í Viðskiptablaðinu. Áskrifendur geta nálgast blaðið undir Tölublöð, aðrir geta gerst áskrifendur hér.

25 ára afmælistilboð VB!

Afmælistilboð VB

Viðskiptablaðið er 25 ára og af því tilefni býðst nýjum áskrifendum að kaupa áskrift á 50% afslætti
Afmælisverðið er aðeins 2.500 krónur.

Tilboðið er fyrir nýja áskrifendur. Núverandi áskrifendur geta bætt við sig áskrift á þessu verði. Gildir út árið 2019. Innifalið í tilboðinu er:

  • - Viðskiptablaðið sent heim
  • - Vefaðgangur að vb.is
  • - Frjáls verslun sent heim
  • - Fiskifréttir sent heim