mánudagur, 8. febrúar 2016
Innlent 8. ágúst 2012 16:32

Samtök ferðaþjónustu segja hækkun vasksins rothögg

Forsvarsmenn SAF skilja ekki í því hvernig þingmönnum dettur í hug að hækka virðisaukaskatt á gistingu úr 7% í 25,5%.

Ritstjórn
Gisting
Aðrir ljósmyndarar

Samtök ferðaþjónustunnar (SAF) furða sig á óstaðfestri frétt RÚV í hádegisfréttum í dag þess efnis að ríkisstjórnin hyggist hækka virðisaukaskatt á gistingu úr 7% í 25,5%. Samtökin telja að þetta skili sér í því að verðið muni hækka um 17,3%.

Fram kemur í tilkynningu frá SAF að fjármálaráðherra og iðnaðarráðherra hafi óskað eftir fundi með forystu samtakanna til að ræða þetta mál. Þá er bent á að í langflestum löndum Evrópu er gisting í neðra þrepi virðisaukaskatts með það að markmiði að fjölga ferðamönnum, ekki síst ráðstefnugestum. Hvergi sé meiri samkeppni en um ráðstefnugesti sem eru meðal verðmætustu gesta.  

Í tilkynningunni segir orðrétt:

„...því verður ekki trúað að þingmönnum detti í hug að veita ferðaþjónustunni slíkt rothögg. Því verður ekki trúað að ríkisstjórnin ætli að taka atvinnugrein, sem nú er á uppleið og skilar erlendum gjaldeyri sem aldrei fyrr, og skattpína hana út af markaðnum. 

Slík stórhækkun skatta verður að sönnu mikill fengur fyrir þá miklu svörtu atvinnustarfsemi sem þrífst í þessari grein og mun auka hana og skekkja þar með enn frekar samkeppnisstöðu þeirra sem vilja fara að lögum.

Samtök ferðaþjónustunnar spyrja hvort mönnum sé alvara?“

Fréttabréf
Vikulegt fréttabréf Viðskiptablaðsins þar sem greint er frá því helsta sem gerst hefur í íslensku og erlendu viðskiptalífi.